Толкование на «Господи помилуй»
ТОЛКОВАНИЕ НА ГОСПОДИ ПОМИЛУЙ,
зело полезно к ведению всякому христианину:
сего ради и переведеся с греческаго.
Перевод старца Паисия (Величковского)
сего ради и переведеся с греческаго.
Перевод старца Паисия (Величковского)
Темже подобает да вемы, яко Сын и Слово Божие, отнележе воплотися и бысть Человек, и пострада толика мучений, и распятся, и излиянием Пресвятые Своея Крове искупи человека от рук диавольских, оттоле по преизбыточеству бысть Господь и Властитель человеческаго естества. Зане, аще и прежде воплощения Господь бе всех тварей, видимых и невидимых, яко Содетель и Творец и Промыслитель тех. Обаче бесы и мнози от человек не хотяху сами имети Его Господа и Властителя себе, иже есть Господь их, сый Господь всего мира. Темже всеблагий Бог, понеже и Ангелы и человеки сотвори самовластны, и дарова им словесность, да имут разум и разсуждение, яко Праведен сый, и Истинен, не хотяще отъяти от них самовластность и господствовати ими нуждею, и не хотящими. Но хотящими быти под властию и окормлением Божиим и господствует и защищает я: не хотящих же паки оставляет творити свою их волю, яко самовластных сущих.
Сего ради и Адама, иже прелстися от отступника диавола, и бысть сам отступник Божий, и не восхоте послушати заповеди Его, остави Бог в самовластности его и не восхоте господствовати им властительски. Но завистник диавол, прелстивый его отначала, не почи прочее прелщати, дондеже сотворил есть его подобна в безсловесии скотом несмысленным. Многомилостивый же Бог наконец всех умилосердися над родом человеческим, и преклони небеса, и сниде на землю, и бысть Человек человека ради, и пречистою Своею Кровию избавил есть его от работы греховныя, и священным Евангелием настави жительствовати богоугодно, и якоже глаголет Иоанн Богослов, даде нам область чадом Божиим быти, и Божественным крещением нас возотроди и возсозда, и пречистыми Своими Таинами на всяк день питает душу нашу и животворит ю, и вкратце, крайнею Своею премудростию обрете образ, да пребывает неразлучен всегда с Ним, яко да не имать к тому ни единаго вместилища в нас диавол.
Елицы убо от христиан по толицех благодеяниих, яже прияша от Владыки Христа, прелстишася паки от диавола, и посредством мира и плоти удалишася от Бога, и господствуются от греха и от диавола, творяще волю его, обаче не суть совершенно нечувственнии, яко не чувствовати зла, еже пострадаша, или страждут, но разумеют погрешение свое, и познают работу юже имут, точию не могут сами собою избавитися, и сего ради притекают к Богу, и зовут: Господи помилуй, яко да умилосердится о них многомилостивый Господь, и да помилует их, да приимет их, аки блудного сына, и даст им паки Божественную Свою благодать, и тою да избавятся от работы греховныя, и да удалятся от бесов, и да приимут паки свободу свою, яко да возмогут сим образом пожити богоугодно, и сохранити заповеди Божия: сии убо христиане, иже якоже рехом, таковым намерением зовут сие: Господи помилуй, получают великую милость всеблагаго Бога, и приимут благодать Его, еже свободитися от работы греховныя и спастися.
А иже не имут отнюдь разума и ведения сих, яже рехом, ниже познают беду свою, яко суть порабощени волям плотским и мирским вещем, ниже имут свободу помыслити работу, еюже содержатся, но кроме сицеваго намерения зовут точию сие: Господи помилуй, многше от обычая, тым како есть мощно прияти милость Божию, и наипаче такову чудну и безмерну милость. Понеже много лучше есть не прияти милости Божия, нежели прияти, и паки погубити, зане сугубо есть погрешение таковых. И паки: аще бы кто дал некий камень многоценен в руце некоему малу детищу, или некоему просту человеку, не ведущу, колико ценится, и тии, приемше в руки своя, погубили быша его: явь есть, яко не они погубиша, но погуби той, иже им дал есть его. И яко да уразумееши лучше глаголемая, помысли, яко в мире сем он, иже скуден и нищь, и хощет прияти милостыню от некоего богати, идет и глаголет ему: помилуй мя, сиречь умилосердися на мя за нищету мою, и даждь ми препитание. И паки: он, иже имать долг, и хощет, дабы ему даровал долг заимодавец его, идет к нему и глаголет: помилуй мя, сиречь умилосердися на мя за скудость мою, и даруй ми долг, имже ти должен есмь. Подобне и погрешитель, хотяй, дабы его простил он, емуже погреши, идет к нему, и глаголет: помилуй мя, сиречь прости ми погрешение еже ти содеях.
Грешник же зовет Богу сие: Господи помилуй, и не весть, ниже что глаголет, ниже чесо ради глаголет, ниже весть, что есть милость Божия, еяже просит у Бога, да даст ему ю, ниже во что пользует ему милость та, еяже ищет, но от обычая точию зовет: Господи помилуй, обаче не весть ничесоже. И како убо дасть ему Бог милость Свою, аще он, не ведая ея презирает ю, и паки вскоре губит ю, и согрешает многше. Милость Божия несть ино, разве благодать всесвятаго Духа, еяже подобает искати от Бога нам грешным, взывая непрестанно: Господи помилуй, тоесть, умилосердися Господи мой на мя грешнаго в бедном устроении, в немже обретаются, и приими мя паки в благодать Твою.
Даждь ми дух силы, яко да укрепит мя противостояти искушениям диавольским и злому обычаю греховному.
Даждь ми дух целомудрия, да уцеломудрюся, и прииду в чувство самаго себе, и исправлюся. Даждь ми дух страха, да боюся Тебе, и да храню заповеди Твоя.
Даждь ми дух любве, да люблю Тя, и да не отлучаюся ктому от Тебе.
Даждь ми дух мира, да хранит душу мою мирну, и да собираю вся моя помышления, и да буду тих и не смущен.
Даждь ми дух чистоты, да блюдет мя чиста от всякия скверны.
Даждь ми дух кротости, да буду кроток ко братиям моим христианом, и да удержуся от ярости.
Даждь ми дух смиренномудрия, да не мечтаю высокая и не горжуся.
Темже он, иже позна, яко имать потребу всех сих, и ищет тех от многомилостиваго Бога, зовый Господи помилуй, сей известнейше приимет искомое, и получит милость у Господа и Божественную благодать Его.
А иже не весть ничесоже от сих, яже рехом, но от обычая точию зовет: Господи помилуй, тому несть мощно когда прияти милость Божию. Занеже и прежде прият многия благодати от Бога, но не позна тех, ниже благодари Бога, давшего ему я.
Прият бо милость Божию, и егда создася и бысть человек.
Прият милость Божию, и егда возсоздася святым крещением и бысть православный христианин.
Прият милость Божию, и егда избавися от толиких бед душевных и телесных, яже искусил есть в жизни своей.
Прият милость Божию и толико крат, еликожды сподобися причаститися Пречистых Таин.
Прият милость Божию, елико крат согреши ко Богу и преогорчи Его грехами своими, и не погубися, ниже наказан бысть, якоже подобаше ему.
Прият милость Божию, егда различными образы благодетельствовался от Бога, и не уразуме того, но вся та забы, и не попечеся о спасении своем отнюдь.
Прочее таковый христианин како приимет милость Божию, не чувствуя и не разумея, яко приемлет таковую благодать от Бога, якоже рехом, ниже ведая, что глаголет, но зовый точию: Господи помилуй, кроме всякого намерения и конца, разве единого обычая.
Источник: Житие и писания молдавского старца Паисия Величковского с присовокуплением предисловий на книги св. Григория Синаита, Филофея Синайского, Исихия Пресвитера и Нила Сорского, сочиненных другом его и сопостником, Старцем Василием Поляномерульским, о умном трезвении и молитве" (Москва 1847). — 2-е издание Козельской Оптиной пустыни. (Репр. воспр. изд. 1847 года Москва. Университетская типография) 2001, стр. 165-169
