Си заповедаю вам, да любите друг друга
Дети, вспоминаю вы Спасово слово, еже рече Своим учеником и Апостолом: си заповедаю вам, да любите друг друга; и о сем еси познают вы, яко Мои есте ученици, и аще пребудете в любви (Ин. 13, 34–35). Такоже и вы, дети, имейте между собой мир и любовь. О том бо и Павел Апостол вопиет и глаголет: весь закон единем скончевается, еже любити друг друга, и ближняго своего аки и сам себе (Гал. 5, 14). Такоже, дети, имейте страх Божий в сердцах своих: тем бо может человек всяку добродетель стяжати. Начало бо, рече, премудрости страх Господень (Притч. 1, 7). Такоже и Григорий Богослов пишет: идеже боязнь Господня, ту плоти чищение, и заповедем Божьим соблюдение; идеже заповедем соблюдение, ту душе возвышение в Горний Иерусалим. А заповедем Божьим соблюдение бывает таковыми делы: покаянием чистым от души о своих прегрешениях на всяк день, милостынею, и удалятися от неподобных дел, еже суть кроме закона Божиа: от блуда, от пиянства, от грабления, от насилия и чародейства, и волшвения и всяких кобей, и от несытства богатства, и от всякаго злаго имения, иже пребывает души на вред. Имейте же, дети, в уме своем смерть и воскрешение и суд и отдаяние комуждо по делом, по Спасову слову, якоже рече: сотворшеи благая во воскрешение животу, а сотворшеи злая воскрешение суду (Ин. 5, 29).
А князи и бояре и вельможи, судите суд милостивно: суд бо без милости есть не сотворшему милости, хвалится милость на суде (Иак. 2, 13); мзды на неповинных не приимайте и не на лица судите, суд бо Божий есть (Втор. 1, 17); судите людем в правду, и вдовиц и сирот и пришлец не обидите, да не возопиют на вас к Богу.
А людская чадь Бога бойтеся, а князя чтите, а святительство имейте выше своея главы, со всяким покорением, без всякаго прекословия, ти бо печалуют день и нощь о душах ваших, понеже воздати им ответ Богови о пастве своей (Евр. 13, 17). Восхочет ли кто небреженьем своего спасения лишитися и вечнаго живота, а не внимая себе слова Спасова, еже рече в Своем Евангелии: придете ко Мне вси труждающиися и обременении, и Аз покою вы (Мф. 11, 28)? Зовет ны Христос в Царство Свое Небесное и велит оставляти тружание бремени греховнаго покаянием, чистым сердцем. Притецыте ко иерею, отцу духовному, с покаянием и со слезами. Отверзите от себе вся дела злая и опять не приступайте к ним: то бо есть истинное покаяние, еже возненавидети первый грехи. И видев таковое дерзновение, иерей может очистити, и приближити к Богу, и причастника сотворити Телу и Крови Христове. Святители бо и иереи ходатаи суть между Богом и человеки. Понеже же немощию обложен, приносят жертву Богови о себе и о людских прегрешениих. Темже, чада, с потщанием будите милостиви и отдатливи, якоже учит ны великий Апостол Иаков, брат Божий: суд бо без милости есть не сотворшему милости (Иак. 2, 13). И ныне, чада, елика сила ваша может — исполнивати закон Божий, не словом, но делом, якоже рече Спас: что Мя зовете: Господи, Господи, а не творите воли Моея (Лк. 6, 46)? И: отъидете от Мене: не веде вас (Мф; 7, 23). Вы же, чада, восприимайте в души ваша и пишите на сердца ваша Евангельския речи, Апостольския проповеди, и святых Отец управления.
Из "Поучения Алексия Митрополита от Апостольских деяний к христолюбивым христианам"
