Отжени от мене вся скверная, лукавая и хульная помышления
Молитва вторая: «Господи! Зриши мою скорбь, зриши мою беду, зриши безстудие врага моего, яко л юти и тяжце нападает на мя хульными помыслы, оскорбляя душу мою, опечаливая сердце мое, помрачая ум мой и смущая совесть мою; его же богохульнаго шептания и богомерзкаго во Уме моем глаголания толико ненавижду, яко первее умрети хотел бых, неже сия на Тя, Благаго Бога моего, помыслы хульные прияти и сим изволяти, яже враг мой во уме моем вещает, но за слабость мою тем противным, и богохульным, и богомерзким мыслем одолети и от себе я отгнати не могу без Твоея, Боже мой, помощи; естество бо мое страстно, ум мой непостоянен, сила моя немощна, супостат же мой крепок, и сила его превосходит моя силы; и аще не бы Ты, Господи, крепок и силен, был в людех Своих, то кто доволен цел сохранен быти от врага и человекоубийцы диавола? Тем припадаю Ти, о Всемилостивый и Премилосердый, не хотяй отчаяния моего, Создателю Боже, и молю всесильную Твою помощь, порази на главу стужающаго ми врага, блесни молниею и раждени обышедшия мя супостаты, возсияй светлую в сердце моем благодати Твоея зарю, да отбежит от мене темный облак хульных находящих на мя мыслей, да в свете помощи Твоея узрю Тебе, Христа моего, просвещающаго всякаго человека, да в свете лица Твоего пойду и о имени Твоем возрадуюся во веки. Аминь».
Молитва третья, на беса хульного: «Да обратится болезнь твоя на главу твою, и на верх твой хула твоя да снидет, лукавый бесе и нечистый; аз бо Господу Богу моему кланяюся и Того никогдаже похулю. Како бы ми возможно Сему досадити или Его похулити, Егоже по вся дни и нощи, и часы славословлю и поклоняюся от всея души моея и крепости, и мысли моея? Но убо славословие мое есть, хула же твоя есть, ты узриши, о них-же Нань клевещеши и яко отступник на Бога глаголеши».
Молитва четвертая, запрещение дьяволу: «Запрещает ти, вселукавый душе, диаволе, Господь, пришедый в мир Пречистою и Святою Девою, воистинну Богородицею, на спасение миру нас деля, грешных. Проклят еси ты, и вся неприязненная твоя помышления, яже в нощи и во дни. Заклинаю тя именем Единосущныя и Неразделимыя Троицы, Отца и Сына, и Святаго Духа, отступи от мене, раба Божия (имя рек), не влагай в сердце мое помыслов неприязненных, но отыди в места пуста и безводная, идеже не присещает Господь. Заклинаю тя, нечистый и богохульный душе, именем Господа нашего Иисуса Христа, не блазнити, не смущати мя хульными помыслы, внегда творити ми молитвы моя ко Господу Богу моему, но да будут вся твоя хульная помышленияла твою главу в день судный: аз бо Господу моему служу и Тому единому возсылаю молитву во дни и в нощи, тебе упраждняющу, мене же милующу и укрепляющу, и оставляющу ми за многую Его благость и милость вся прегрешения. Иди за мной, сатано, и проклят буди ты и вся неприязненная твоя и противная сила, яко благословися и прославися пречестное имя Отца и Сына, и Святаго Духа, ныне и присно, и во веки веков. Аминь».
Молитва пятая, к Пресвятой Богородице: «Пресвятая Владычице моя Богородица, святыми Твоими и всесильными мольбами отжени от мене, окаяннаго раба Твоего, уныние, забвение, неразумие, нерадение и вся скверная, лукавая и хульная помышления от окаяннаго моего сердца и от помраченнаго ума моего и погаси пламень страстей моих, яко нищ есмь и окаянен. Избави мя от многих и лютых воспоминаний и предприятий, и от всех действ злых свободи мя. Яко благословенна еси от всех родов и славится пречестное имя Твое во веки. Аминь».
Молитва шестая, к Богу: «В руце Твоего превеликаго милосердия, о Боже мой, вручаю душу и тело мое, чувства и глаголы моя, советы и помышления моя, дела моя и вся души и тела моего употребления, вход и исход мой, веру и жительство мое, течение и кончину живота моего, день же и час издыхания моего, преставление и упокоение, и воскресение души и тела моего со всеми святыми избранными Твоими. Ты же, Преблагий и Человеколюбивый Боже, приими мя в руце защищения Твоего и избави мя от всякаго зла; прости множество грехов моих, очисти оскверненную мою душу и тело и сохрани мя в крове милости Твоея во вся дни живота моего, яко да Твоею благодатию укрепляемый избавлюся от ловящих мя сетей вражиих и, Твоею благостынею в чувство приведен и на путь истиннаго покаяния наставлен, сподоблюся христианския кончины живота моего, безстрастныя, непостыдныя, мирныя и немятежныя от воздушных духов пришествия, и добраго ответа на Страшном Твоем Суде, и да сподоблен буду зрения неизреченныя Ти славы и слышания пресладкаго Твоего благословеннаго Ти гласа, и у Тебе, Бога моего, да получу жизнь и спасение. Аминь».
После этого говори псалом 26: «Господь — Просвещение мое и Спаситель мой..». Потом: «Достойно есть..». и отпуст.
Если можно будет, сотвори и поклонов по силе и, с Божией помощью, избавишься от хульных мыслей.
Святитель Димитрий Ростовский. «Творения»
